स्याङ्जाको आँधीखोलामा पौडी खेल्ने क्रममा डुबेर बेपत्ता भएका एक युवकको शव २४ घण्टापछि फेला परेको छ।

सल्यानको सिद्ध कुमाख गाउँपालिका वडा नम्बर १ घर भई हाल स्याङ्जाको गल्याङ नगरपालिका–११ मुडकिल्लामा रही स्थानीय पुल निर्माणमा काम गर्दै आएका अन्दाजी २५ वर्षीय बलदेव बस्नेतको शव फेला परेको हो।

बस्नेत शनिबार (साउन २४ गते) दिउँसो करिब २:३० बजे गल्याङ नगरपालिका–७ स्थित आँधीखोलामा पौडी खेल्न गएका थिए। सोही क्रममा उनी खोलामा डुबेर बेपत्ता भएका हुन्।

घटनाको जानकारी पाएलगत्तै प्रहरी चौकी गल्याङ र ३० नम्बर हे.क्वा. गुल्म वालिङ स्याङ्जाबाट प्रहरी टोली खोजीका लागि परिचालन गरिएको थियो। खोजी गर्ने क्रममा बस्नेत बेपत्ता भएकै स्थानमा मृत अवस्थामा फेला परेका हुन्।

प्रहरीले शवलाई खोलाबाट बाहिर निकालेको छ भने घटना सम्बन्धमा थप अनुसन्धान भइरहेको जनाएको छ।